29 abr 2011

Nba : yat tignit n umennuɣ amaziɣ takuf...

Ur diɣ ingara useggwas n 2960 ar lliɣ aɣ iṣṣemḍi aggas ɣ tgira n wussan nnes, zud iɣ aɣ ifel mas at id nkwtti sul gar akwttay! aylli aɣ iṣṣemḍi useggwas-a d tmettant n yan ɣ tarwa n Tmazɣa, yan idrus a naf nɣ neẓṛa zund netta, ismun nger taẓuṛi s udmawn nnes d tɣensa s iɣarasn nnes; Ameɣnas-anaẓuṛ Mbarek Ulεerbi lli issen kigan s Nba, yan ɣ inbdaden n tṣeḍma Saghru Band, yat ɣ trubba istin tizlit ittnaɣn teg talkiwt n uɣwyyi n ugdud amaziɣ n Anẓul-ugmiḍ, issutr ɣ tzlatin nnes ad urrint wallen s tmazirt n umaziɣ ad ẓeṛnt gar adda lli ɣ llan. Ifel aɣ Nba ɣ yan uwetay idrusn ur izrin 29 n useggwas, illa ma yttinin Nba immut s tmaḍunṭ n Churg Strauss, ili ma yttinin immut fkan as acetci, turda ad tameggarut ar tt nẓeṛṛa ɣ iṣiwḍen n tmagrawin iswwurin ɣ umussu amaziɣ. Iwiz ameggaru ɣ neẓṛa Nba d tṣeḍma nnes igat win ulmuggar n Twiza ɣ Ṭanǧa, iwiz ad yucka-d ɣ tgira n wahli n tffugliwin lli isker Nba ɣ kigan n iɣerman ɣ Lmeṛṛuk ura ɣ beṛṛa nnes ɣ useggwas lli izrin.